Ní gá duit ach siúl ó bhun Shráid Dhúbhaise suas Bóthar na bhFál agus a fhad le Baile Mhic Aindreasa agus na ceantair máguaird. Tchítear tionchar an phobail agus tionchar na Gaeilge in achan eile áit, ó Raidió Fáilte go Cultúrlann McAdam Ó Fiach, ó Laochra Loch Lao go hIonad Uibh Eachach, agus achan áit idir eatharthu tá lorg an phobail le feiceáil.
Ón chéad lá a bhog mé go Béal Feirste mar scoláire Gaeilge ar Ollscoil na Banríona bhí sé mar phribhléid agam a bheith mar chuid de phobal na Gaeilge sa chathair. Bhí sé de phleisiúr agam aithne a chur ar phobal an iarthair a chuir tús le hathbheochan na Gaeilge sa chathair, amhail Chlann Mhic Sheáin nó Chlann Ua Bruadair. Agus ba le bród a chuir mé aithne ar a sliochtaigh, daoine atá mar thoradh na deaoibre sin agus atá ag tógáil uirthi, agus ag cur fréamhacha don chéad ghlúin eile.
Ba le hónóir agus le bród fosta, mar sin, a chuir mé tús le ról úr le ceann de na nuachtáin is láidre sa tír seo, an Andersonstown News. Tá lúcháir orm a bheith mar iriseoir Gaeilge leo anois agus ag clúdach scéalta i mBéal Feirste a bhaineann le pobal na Gaeilge. Mar nuachtán atá lonnaithe ina phobal féin, tá na scéalta sin thar a bheith tábhachtach.
Creidim go láidir go bhfuil áit thábhachtach shuntasach ag iriseoireacht agus ag nuachtáin i ndaonlathas ar bith. Feidhmíonn siad mar fhóraim do dhaoine le comhráite a bheith acu, agus bíonn iriseoirí go minic ag cur na gceisteanna nár mhaith le gnáthbhall an phobail a chur. Tá an t-ardán céanna tuillte ag pobal na Gaeilge anseo i mBéal Feirste, agus mar a dúirt mé i nuachtán na seachtaine seo caite, tá Béal Feirste anois mar phríomhchathair athbheochan na teanga sa tír seo. Ó aimsir an Oireachtais anuraidh go dtí aimsir na Fleidhe i mbliana, tá an oiread ag tarlú in achan chearn den chathair bheo, bhríomhar seo.
Beidh sé mar phribhléid agam a bheith ag comhoibriú leis an phobal sin sna míonna amach romhainn. Tá súil agam go n-éireoidh liom deis a thabhairt daofa a gcuid scéalta féin a roinnt liom go hoscailte agus go hionraic, agus go mbeidh obair an phobail le feiceáil go soiléir ag an domhan mhór.